Jopang

Jopang atawa Jopun joda da salah say nagara say pok na di Asia Darak, say mayoritas na dihuni Jolma Jopang, basa say dipakay tiyan joda da Bahasa Jopang.

Jopang
日本国
Nippon-koku/Nihon-koku
Jopang

Bandira	Lambang
Gambar Wilayah
Samboyan: -
Lagu Kabangsoan: 君が代 Kimigayo Komering: Kakuasoan sai Mulio
Informasi Dasar
Indok Bandar	Tokyo
Borak Wilayah	377.975 km²
Basa	Jopang
Suku Bangsa	Jolma Jopang
Jumlah Panduduk	125.416.877 jiwa
Agama	Shinto
Pamarintah	Kaisar Naruhito Pardano Mantori Fumio Kishida
Mata Uang	Yen (¥) (JPY)
Zona Waktu	UTC+9
Informasi Barihna
Lajur Kamudi	Kiri
Kode Talipon	+81
Banua	Asia
Kode Internet	.jp

Baruyut Kata

Jopang tisobut Nippon atawa Nihon dilom bahasa Jopang. Karuwa kata hasa titulis rik tulisan kanji say goh-goh, joda da 日本 (sacara harfiah: asal-muasal mataharani). Sobutan Nippon galak tipakay dilom urusan resmi, tikuruk da golar nagara dilom duit Jopang, parangko, rik partandingan olahraga internasional. Samantara sina, sobutan Nihon tipakay dilom urusan mak resmi hamak pocak waktu ngumung sahari-hari.

Budaya

Masakan rik Kani'an

Masakan Jopang nawarkan bumacom-macom makanan khas daerah say makay resep tradisional rik bahan-bahan lokal. Kani'an Lawok rik Okan atawa Mie Jopang joda da kani'an pokok tradisional. Kari Jopang, samenjak tikonalko di Jopang jak British India, tikonsumsi sacara luas sampai pacak tisobut sabagay hidangan nasional, barong-barong rik ramen rik sushi . Pormin tradisional Jopang tikonal sabagay wagashi. Bahan-bahan pocak pasta rotak siyaw rik mochi tipakay. Salera say lobih modern tikuruk Es Krim, rik Teh hujau.

Inuman populer di Jopang joda da sake, say joda da inuman biyas say tiseduh biasona ngandung 14–17% alkohol rik tiguway ngaliyu'i fermentasi biyas. Bir kok tiseduh di Jopang jak akhir abad ke-17. Teh hujau tiproduksi di Jopang rik tiolah dilom bontuk pocak matcha, tigunako dilom upacara nginum teh Jopang.

Agama

Torii Kuil Shinto Itsukushima di Hiroshima

Konstitusi Jopang njamin kabebasan buagama sacara ponuh. Pakiraan njajakko bahwa 84–96% panduduk Jopang nganut agama Shinto sabagay agama asli tiyan. Tapi, pakiraan sa tidasarko di jolma-jolma say buafiliasi rik kuil, layon jumlah jolma say bonor-bonor buiman. Lamon Jolma Jopang nganut agama Shinto rik Buddha, tiyan ngidentifikasi diri rik karuwa agama sina atawa nggambarko diri tiyan sabagay non-religius atawa spiritual. Tingkat partisipasi dilom upacara kaagamaan sabagay tradisi budaya lokok lamon, terutama sa'uni festival rik acara juk kunjungan kuil partamo di Tahun Baru . Taoisme rik Konfusianisme (Kong Hu Chu) jak Cina juga ngaruhi kaparcayaan rik adat istiadat Jopang.

Agama Nasrani partamo kali tikonalko guk Jopang bak misi Jesuit say timula'i jak tahun 1549. Ganta sa, 1% sampai 1,5% panduduk Jopang buagama Kristen. Satijang abad tarakhir, adat istiadat Barat say awalna bukahikan rik agama Kristen (tikuruk da Kahwin gaya Barat, Harani Valentine, rik Natal) kok jadi populer sabagay adat sekuler di antara lamonna Jolma Jopang.

Sakitar 90% jak tiyan say nganut agama Islam di Jopang joda da Jolma Ratongan (migran) kalahiran asing. Di tahun 2018 tiparkirako uwat 105 Masigid rik 200.000 Muslim di Jopang, 43.000 di antarana joda da warga asli nagara Jopang. Agama minoritas barihna tikuruk da Hindu, Yahudi, Iman Baháʼí, rik kaparcayaan animisme Ainu.